Në datën 6 Mars 2017, në ambjentet e Hotel Tirana International, u zhvillua ceremonia e përurimit të shoqatës së Bashkimit të Prodhuesve Shqiptarë, ku ishin të ftuar përfaqësues nga institucione shtetërore dhe ambasadorë, përfaqësues të sipërmarrjes prodhuese si dhe të dhomave të tregtisë dhe industrisë. Gjithashtu në këtë ceremoni ishin të ftuar përfaqësues nga Oda ekonomike e Kosovës, Oda Ekonomike e Maqedonisë Veri-Perëndimore si dhe të Klubit të Prodhuesve të Kosovës.

Ceremonia u hap me fjalën përshëndetëse të Kryeministrit të Shqipërisë Z. Edi Rama, i cili e vlerësoi këtë nisëm si një moment të ri maturie të sipërmarrjes prodhuese, e cila i vjen në ndihmë, jo vetëm sipërmarrësve të angazhuar në këtë bashkim, por dhe vetë punës së qeverisë dhe agjencive shtetërore, të përfshira në procesin e nxitjes së prodhimit vendas.Kryeministri shprehu gatishmërinë e tij dhe të qeverisë për të ndërvepruar ngushtësisht me shoqatën, përmes krijimit të urave të kontaktit, si mënyra më e mirë për të mbështetur dhe nxitur prodhimin shqiptar.

Znj. Donika Mici, zv.Presidente e shoqatës së Bashkimit të Prodhuesve Shqiptarë u shpreh se ky organizim i ri beson se komuniteti i sipërmarrjes shqiptare ka potenciale te jashtëzakonshme dhe te pashfrytëzuara. Bashkimi i Prodhuesve Shqiptarë do të përfaqesojë dhe mbrojë fuqimisht interesin e përbashkët të prodhuesve shqiptarë, në mënyrë të përditshme dhe korrekte, duke synuar dhënien e kontributit në zhvillimin e qëndrueshëm ekonomik në vend.

Në fjalën e tij përshëndetëse Z. Astrit Shabani, kryetar i Klubit të Prodhuesve të Kosovës tha se ky është një moment i veçantë për sipërmarrjen prodhuese. Kryetari i Odës Ekonomike të Maqedonisë Veri-Perëndimore Z. Nebi Hoxha përgëzoi krijimin e këtij organizimi në interes të prodhuesve shqiptarë në Shqipëri, Kosovë e Maqedoni. Kryetari i Odës Ekonomike të Kosovës Z.Safet Gërxhaliu tha se ky nuk është thjesht themelimi i një klubi të rëndësisë së vecantë, por edhe kthimi ndaj ardhmërisë si mënyra e vetme për të përmirësuar imazhin e kombit shqiptar.

Nje fjalë përshëndetëse ka mbajtur edhe Kryeinspektori i Përgjithshëm z. Shkëlqim Hajdari i cili përgëzoi faktin që biznesi shqiptar në Shqipëri, Kosovë e Maqedoni po bën hapa konkretë në vendosjen e marrëdhënieve të bashkëpunimit.