Pas takimeve dhe tryezës së Komitetit për Legjislacionin, Taksat dhe Procedurat, zhvilluar me datë 30 tetor 2017, ku u diskuan çështje në lidhje me draft paketën fiskale 2018, Bashkimi i Prodhuesve Shqiptarë ka përgatitur një material mbi komente dhe propozime nga sipërmarje prodhuese e cila ju është përcjellur për marrje në konsideratë:
– Ministrisë së Financave dhe Ekonomisë;
– Ministrisë së Shtetit për Mbrojtjen e Sipërmarrjes;
– Komisionit për Ekonominë dhe Financat, Kuvendi i Shqiperisë;
– Komisionit për Veprimtarinë Prodhuese Tregtinë dhe Mjedisin, Kuvendi i Shqipërisë.
Komentet dhe propozimet e sipërmarrjes prodhuese mbi paketën fiskale 2018, janë:
1. Për propozimin e projektligjit “Për disa ndryshime dhe shtesa në ligjin nr. 9632, datë 30.10.2006, “Për sistemin e taksave vendore”, të ndryshuar, kërkojmë që në pikën 1, Nenin 22/2, Shkalla e taksës mbi ndërtesat e cila aplikohet si përqindje e bazës së taksës, nga 0.15% për ndërtesën që përdoret, shfrytëzohet për veprimtari ekonomike që ështe propozuar, kërkojmë të bëhet 0.05% për veprimtaritë prodhuese.
2. Për propozimin e projektligjit “Për disa shtesa dhe ndryshime në ligjin nr. 92/2014 “Për tatim mbi vlerën e shtuar në Republikën e Shqipërisë”, të ndryshuar, kërkojmë që kufiri minimal i regjistrimit për TVSH-në, të jetë pa shkallëzimin e pragut 2.000.000 lek për njësitë tregtuese.
3. Për propozimin e projektligjit “Për një ndryshim në ligjin nr. 61/2012 “Për akcizat në Republikën e Shqipërisë, të ndryshuar, kërkojmë heqjen e akcizës për lëndët e para djegëse.
Gjithashtu, po Ju përcjellim disa propozime shtesë të industrive prodhuese në lidhje me paketën fiskale 2018:
– Heqjes së taksave doganore për artikujt që janë lëndë e parë për industrinë prodhuese;
– Reduktimit të taksës mbi artikullin me kod 39235010 (Tapa dhe pipeta për prodhimin e shisheve plastike). Kjo tarifë arrin në 50 % të çmimit të blerjes së këtij artikulli ndërkohë kur në vendet e rajonit është 0 ÷ 6 % (Greqi 0 %, Kosovë 0 %, Mali i zi 3 %, Maqedonia 6 %, Bullgari 0 %). Kjo taksë, që i vë në vështirësi të gjitha industritë vendase, propozojmë të ulet nga 100 lekë / kg në 10 lekë / kg dhe të shtrihet, pa përjashtim, në të gjithë produktet dhe ambalazhet plastike;
– Rishikimit të legjislacionit për rimbursimit të TVSH dhe Akcizës duke hequr kushtëzimin e rimbursimit me kontrollin e detyrueshëm ndaj subjekteve dhe duke përcaktuar sanksione ndaj administratës shtetërore për vonesa në rimbursim;
– Heqjes së plotë të TVSH në import për makineritë/pajisjet për prodhuesit vendas;
– Heqjen e TVSH-së për shërbimet e veterinarisë, (TVSH për medikamente veterinare është 0%, kërkojmë të bëhet 0% dhe për shërbime veterinare);
– Heqjen e TVSH-së për shërbime ndaj kafshëve, (TVSH për shërbime humane është 0% dhe kërkojmë që dhe për shërbimet ndaj kafshëve të bëhet 0%.